महागाव तालुक्यात बोगस बियाणे ,रासायनिक खते विक्री रोखण्याचे आव्हान(कृषी विभागाने शेतकऱ्यांना फसविणाऱ्या विक्रेत्यांवर कारवाई करणे गरजेचे)महागाव:-तालुक्यातील अनेक गावांमध्ये असलेल्या कृषी केंद्रांमधून बोगस बियाणे,रासायनिक खते मोठ्या प्रमाणात विकून शेतकऱ्यांची फसवणुक केल्या जात असल्याचे प्रकार सर्रास सुरू असून कृषी विभागाने याकडे लक्ष घालुन या विक्रेत्यांवर कारवाई करणे गरजेचे असल्याचे बोलल्या जात आहे.खरीप हंगाम ऐन काही दिवसांवर येवुन ठेपला असुन पेरणी साठी बियाणे खरेदी साठी शेतकऱ्यांची लगबग सुरू झाली असुन शेतकरी मोठ्या विश्वासाने कृषी केंद्र चालकांकडून बियाणे रासायनिक खते खरेदी करीत असतो.परंतु शेतकऱ्यांच्या याच विश्वासाचं गैर फायदा घेत तालुक्यातील अनेक कृषी केंद्र चालक राज्यात प्रतिबंधित असलेल्या तसेच लगतच्या राज्यातील तेलंगणा,गुजरात राज्यातील बोगस सोयाबीन ,कापुस बियाणे,रासायनिक खते चढ्या दराने विकुन शेतकऱ्यांची फसवणुक करून आर्थिक लुबाडणूक करीत आहेत.शेतकरी आपल्या शेतात सोयाबीन पेरणी ,कापुस लागवड करीत असतात दरवर्षी या बियाण्यांचे भाव वाढत आहेत.लागवड खर्च मोठा होत असताना मात्र उत्पन्न कमी मिळत असल्याने शेतकरी या बियाण्याच्या खरेदीसाठी बँक,खाजगी सावकारांचे कर्ज घेत असतात.शेतकऱ्यांनी हे बियाणे आपल्या शेतात पेरल्या नंतर उगवतच नसल्याचे अनेक प्रकार यापूर्वी घडले .परंतु कृषी विभागाकडून याकडे गांभीर्याने लक्ष दिल्या जात नसल्याने या बोगस बियाणे विक्रेत्यांचे चांगलेच फावत आहे.त्यामुळे बोगस बियाणे,रासायनिक खते विकुन शेतकऱ्यांना फसविणाऱ्या या कृषी केंद्र चालकांवर परवाना रद्द करून त्यांच्यावर फौजदारी किंवा कायम स्वरुपी कारवाई करण्याचे तगडे आव्हान कृषी विभागासमोर उभे आहे.