🌸बुद्ध भवनाच्या पायरीवरून भाग- 3🌸

🌸बुद्ध भवनाच्या पायरीवरून भाग- 3🌸
डॉ. बाबासाहेब आंबेडकर हे लोकशाहीचे भोक्ते होते. आधुनिक भारतात सर्व प्रकारची लोकशाही निर्माण झाली पाहिजे, ही डॉ बाबासाहेब आंबेडकरांची अपेक्षा होती. बाबासाहेबांनी आपल्या देशाचे संविधान 26 नोव्हेंबर 1949 रोजी देशाला समर्पित केले; त्या अगोदर 8 जुलै 1945 रोजी शिक्षण संस्था स्थापन करून ती लोकांना समर्पित केली. त्या संस्थेवर नेमले गेलेले पदाधिकारी हे खऱ्या अर्थाने लोकांचे ‘विश्वस्त’ या कसोटीला उतरतील आणि देशात नैतिक, बौद्धिक व सामाजिक लोकशाही निर्माण करणारे विद्यार्थी व कर्मचारी संस्थेच्या मुशीतून तयार होतील असे वातावरण संस्थेत निर्माण करतील या अपेक्षने या पदाधिकाऱ्यांकडे पाहिले; परंतु याच्या नेमके उलट वातावरण तयार झाले. अस्तित्वात असलेल्या पदाधिकाऱ्यांची हतबलता म्हणून आनंदराज आंबेडकर साहेबांचा संस्थेत प्रवेश झाला आणि हीच गोष्ट संस्थेच्या, समाजाच्या, आंबेडकरी चळवळीच्या आणि देशाच्या सुद्धा दृष्टीने अत्यंत महत्त्वाची ठरली. आनंदराज आंबेडकर साहेबांनी ‘ऑनरेबल चेअरमन’ म्हणून सूत्रे हातात घेतली आणि संस्थेच्या विकासाला गती मिळाली. आनंदराज आंबेडकर साहेबांच्या सहवासात आल्यानंतर मी संस्थेच्या एकूणच व्यवस्थेत परिवर्तन आणण्याच्या दृष्टीने हातपाय हलवायला सुरुवात केली. संस्थेच्या सेवेत असताना मी माझ्या युनिटपुरते अनेक उपक्रम राबवून माझ्या युनिटकडे समाजाचे लक्ष वेधले. सेवानिवृत्तीनंतर मात्र मी माझ्या कामाची कक्षा वाढवली. बुद्ध भवनातील सिद्धार्थ कॉलेजात ऍडमिशन घेऊन एकूणच पीपल्स एज्युकेशन सोसायटीच्या सर्वच शाखांकडे समाजाचे लक्ष वेधण्याचा प्रयत्न आता मी करीत आहे. पीपल्स एज्युकेशन सोसायटीच्या प्लॅटफॉर्म वरून जरी डॉ. बाबासाहेब आंबेडकरांनी आधुनिक भारतात नैतिक, बौद्धिक व सामाजिक लोकशाही प्रस्थापित करण्याची घोषणा केली असली तरी ती या देशाच्या केंद्र सरकारच्या मनुष्य बळ विकास खात्याने व प्रत्येक राज्याच्या शिक्षण खात्याने विचारात घेण्याची गोष्ट आहे. मी आता हा संदेश अगदी आदिवासी भागातील विद्यार्थी, पालक व समाजातील जाणकार लोकांपर्यंत पोहोचवण्यासाठी पालघर जिल्ह्यातील डहाणू तालुक्यातील आदिवासी पाड्यांवरील शाळांना भेटी देत आहे. त्यांपैकी जिल्हा परिषद प्राथमिक शाळा, ढाकपाडा ता. डहाणू जि. पालघर या शाळेला भेट दिली.या भेटीत आदिवासी विद्यार्थ्यांमध्ये प्रचंड पोटेंशियल असल्याचे माझ्या लक्षात आले. आज शनिवार दि. 7 डिसेंबर 2024 रोजी ‘डिप्लोमा इन पालि’ च्या क्लासच्या निमित्ताने बुद्ध भवनाच्या पायरीवरून जेव्हा मी आदिवासी पाड्यांवरील शाळांकडे पाहतो आणि त्याच वेळी पीपल्स एज्युकेशन सोसायटीचे ‘ऑनरेबल चेअरमन’ म्हणून आनंदराज आंबेडकर साहेबांकडे पाहतो तेव्हा डॉ. बाबासाहेब आंबेडकरांच्या दृष्टीकोनातून या देशाचे शैक्षणिक धोरण व एकूणच शिक्षण व्यवस्था कशी असावी याचे मार्गदर्शन ऑनरेबल चेअरमन आनंदराज आंबेडकर साहेब यांच्या नेतृत्वाखाली पीपल्स एज्युकेशन सोसायटी करू शकते असा आत्मविश्वास मला वाटतो.
श्रीपती ढोले, मुंबई
मो. 9834875500
W. 8888578874