🌸बुद्ध भवनाच्या पायरीवरून भाग- 4🌸

🌸बुद्ध भवनाच्या पायरीवरून भाग- 4🌸
डॉ. बाबासाहेब आंबेडकरांच्या संस्था आणि डॉ. बाबासाहेब आंबेडकरांचे कुटुंब हा माझा चिंतनाचा विषय असल्यामुळे या बाबतीत जे जे घडते ते जनतेच्या लक्षात आणून देणे हा आम्ही सुरू केलेल्या ‘संस्था भीमाच्या आणि घराणे भीमाचे अर्थात राजगृहाकडे चला’ या अभियानाचा भाग ठरतो. आज शनिवार दि. 14 डिसेंबर 2024 म्हणजे आमचा सिद्धार्थ कॉलेज ऑफ आर्ट्स, सायन्स अँड कॉमर्स, बुद्ध भवन फोर्ट मुंबई’ या कॉलेजातील तिसऱ्या माळ्यावरील रूम नं. 32 मध्ये ‘डिप्लोमा इन पालि’ चा क्लास भरण्याचा दिवस. प्रा. डॉ. विनोद भेले सरांनी एक तास म्हणजे ‘तितर जातक वण्णना’ हे जातक शिकवले आणि नंतर आमची नागपूरच्या बुद्ध विहार समन्वय समितीने घेतलेली 1ली व 2री परीक्षा झाली; पण आजच्या क्लासच्या निमित्ताने जे संदर्भ मिळाले ते शेअर करताना अतिशय आनंद होत आहे.दस्तुरखुद्द ‘डॉ.बाबासाहेब आंबेडकर’ पीपल्स एज्युकेशन सोसायटीचे ‘ऑनरेबलअरमन’ असताना ज्यांना बुद्ध भवनातील सिद्धार्थ कॉलेजचा विद्यार्थी म्हणून बुद्ध भवनात वावरता आले त्यात कदाचित घनश्याम तळवटकर,न्या.पी.बी.सावंत, एन. एम. कांबळे, राज्यपाल एम. सी. भंडारे, दादासाहेब रूपवते यांसारख्या दिग्गजांचा समावेश असेल; मात्र त्यानंतर ‘आंबेडकर’ च ‘ऑनरेबल चेअरमन’ असताना बुद्ध भवनात विद्यार्थी म्हणून वावरण्याचे भाग्य माझ्या वयाच्या ज्या काही फार थोड्या लोकांना लाभले त्यात माझा सुद्धा नंबर आहे याचा मला सार्थ अभिमान वाटतो. सर सेनानी आनंदराज आंबेडकर साहेबांचा कार्यकर्ता म्हणून साहेबांच्या सहवासात खूप वावरलो आणि अजूनही वावरत आहे; परंतु आनंदराज आंबेडकर हे पीपल्स एज्युकेशन सोसायटीचे ऑनरेबल चेअरमन आणि श्रीपती ढोले हे पीपल्स एज्युकेशन सोसायटी संचलित सिद्धार्थ कॉलेज ऑफ आर्ट्स सायन्स अँड कॉमर्स च्या ‘डिप्लोमा इन पालि’ चा विद्यार्थी या वेगळ्या नात्याने साहेबांची आज भेट झाली. साहेब सुद्धा ‘चेअरमन’ म्हणूनच वागले आणि मी सुद्धा ‘विद्यार्थी’ म्हणूनच वागलो. साहेबांचे कॉलेजला येण्याचे निमित्त सुद्धा आनंददायीच. ‘नॅक’ कमिटीने कॉलेज ला B+ ग्रेड दिला तो आज शनिवार दि. 14 डिसेंबर 2024 रोजी जाहीर करण्यात आला त्यामुळे प्राचार्य व स्टाफ यांचे कौतुक करणे व त्यानिमित्ताने विविध गुणदर्शन कार्यक्रम सादर करणाऱ्या विद्यार्थ्यांच्या पाठीवर थाप मारणे हा आजच्या साहेबांच्या कॉलेज भेटीचा मुख्य उद्देश होता. वयाच्या 23 व्या वर्षी पीपल्स एज्युकेशन सोसायटीच्या हायस्कूलचा शिक्षक, वयाच्या 48 व्या वर्षी डॉ.बाबासाहेब आंबेडकरांच्या नातवाच्या म्हणजे सर सेनानी आनंदराज आंबेडकर साहेबांच्या रिपब्लिकन सेनेचा जबाबदार पदाधिकारी आणि वयाच्या 60 व्या वर्षात डॉ. बाबासाहेब आंबेडकरांचे नातू आनंदराज आंबेडकर साहेब पीपल्स एज्युकेशन सोसायटीचे ‘ऑनरेबल चेअरमन’ असताना पीपल्स एज्युकेशन सोसायटीच्या दस्तुरखुद्द डॉ. बाबासाहेब आंबेडकरांनी सुरू केलेल्या कॉलेजचा विद्यार्थी असणे,असा योगायोग माझ्या शिवाय इतर कोणाच्याही जीवनात येणे कदापिही शक्य नाही. आज ज्या विद्यार्थ्यांच्या रांगेत मी जाऊन बसलो त्या बुद्ध भवनातील सिद्धार्थ कॉलेज च्या काही ठळक विद्यार्थ्यांची यादी या ठिकाणी मुद्दाम देत आहे. म्हणजे ‘पीपल्स एज्युकेशन सोसायटी’ ही मनुष्य बळ घडवण्याच्या बाबतीत किती मोठी व श्रीमंत आहे, हे आपल्या लक्षात येईल. वेगवेगळ्या क्षेत्रात उत्तुंग भरारी घेणारे पीपल्स एज्युकेशन सोसायटीच्या बुद्ध भवनातील सिद्धार्थ कॉलेजचे काही ठळक विद्यार्थी.
1) रमेश तेंडुलकर 2) न्या. एच. एच. कठारिया 3) अभिनेता जितेंद्र 4) सुलभा देशपांडे 5) राजश्री शांताराम 6) प्रा. केशव मेश्राम 7) कॉ. आर. सी. कर्णिक 8) गोविंदराव आदिक 9) एस. एन. नावारे 10) शशिकांत कर्णिक 11) फारुख इंजिनिअर 12) दिलिप सरदेसाई 13) पद्माकर शिवलकर 14) विनोद मानकद 15) प्रा. जमसांडेकर 16) राजा ढाले 17) प्रा. एल. सी. मालसे 18) रंजन बिंदुर 19) डॉ. भालचंद्र मुणगेकर 20) ऍड. प्रकाश तथा बाळासाहेब आंबेडकर 21) श्रीकांत तळवटकर 22) खा. रामदास आठवले 23) खा. अरविंद सावंत 24) बी. शंकरानंद 25) लालन सारंग 26) भीमसेन देठे 27) भुजंग मेश्राम 28) रमाकांत देसाई 29) रंजना तळवटकर 30) जयवंत वाडकर 31) खा. बी. बसवलिंगप्पा 32) प्रा. आनंद देवडेकर 33) ए. जी. पवार 34) वसंत गुर्जर 35) सी. टी. खानोलकर 36) जी. के. ऐनापुरे 37) ऍड. संघराज रूपवते 38) डॉ. भीमराव यशवंतराव आंबेडकर 39) रमेश एम. उबाळे 40) संजीव बोधनकर 41) अशोक खाडे 42) डॉ. विजय मिश्रा. ही जी ठळक नावाची यादी आहे त्यावरून आधुनिक भारताला नितांत आवश्यक असणारी नैतिक, बौद्धिक व सामाजिक लोकशाही प्रस्थापित करण्यासाठी पीपल्स एज्युकेशन सोसायटीने किती मोठे मनुष्य बळ पुरवले आहे! हे मनुष्य बळ बाबासाहेबांच्या पीपल्स एज्युकेशन सोसायटीचे आहे, हे येणाऱ्या पिढ्यांना जाणीवपूर्वक सांगणे गरजेचे आहे, असे माझे स्पष्ट मत आहे. ही पीपल्स एज्युकेशन सोसायटीच्या एका कॉलेज च्या ठळक विद्यार्थ्यांची यादी आहे. इतर कॉलेजांनी सुद्धा आपल्या विद्यार्थ्यांची यादी जाहीर करावी;म्हणजे पीपल्स एज्युकेशन सोसायटीचा करिश्मा येणाऱ्या पिढ्यांना कळेल.
श्रीपती ढोले, मुंबई
मो. 9834875500
W. 8888578874